Draginja Vuksanovic

Narodna imovina pripada svima, a ne tajkunima

SDP naglašava da je današnja borba za državu dominantno borba za zaštitu narodne imovine i vladavinu prava kojom se jedino i može ostvariti da dobra Crne Gore služe svima.

Ta borba nije manje važna i teška nego kada smo se borili za ime Crne Gore i njeno pravo da postoji.

Pohara imovine i bahat odnos prema državnim kompanijama, koje se najčešće nezakonito otuđuju i daju u bescijenje pozajmljenim imenima njihovih tajkuna glavno je obilježje ekonomske politike DPS-a. Javnosti je poznato koliko je truda SDP uložila da sačuva državna dobra i da smo u mnogim slučajevima u tome i uspjeli.

Crna Gora je malo parče zemlje ali istovremeno jedno od najljepših na svijetu, i zato je prostor, posebno obala, naša glavna ekonomska prednost. Zato je odnos prema prostoru, kojega oličava DPS razvojna parola „poslije nas potop“, zločin prema državi, građanima i posebno generacijama koje dolaze.

Jedna generacija tajkuna bliskih vlasti ili tzv. investitora želi da potroši sav prostor koji je neobnovljiv resurs. Uz to, kroz nezakonite i štetne poslove i ugovore. I sve to naravno nije razvoj, kako pokušavaju obmanjivati, već klasična korupcija kojoj će se tek suditi.

Ali građani mogu biti sigurni u jedno. Promjene koje dolaze, sa nikada snažnijim SDP-om poslije 16. oktobra, donijeće reviziju i poništavanje svih takvih antidržavnih, štetnih i nezakonitih prodaja i privatizacija. Nezakonito otuđena dobra moraju biti vraćena državi i narodu, a odgovorni za to moraju biti privedeni pravdi.

Jedino kroz takvu, snažnu i beskompromisnu akciju, i pokretanje odgovornosti možemo omogućiti da naša dobra i naša država pripada svima.

 

Draginja Vuksanović – poslanica SDP-a u Skupštini Crne Gore